Author: K.Mohanarangan

முன் நடந்தவர்கள்

பதித்த தடத்தில்

எவரெவரோ

ஏற்றிவைத்த

விளக்குகளின்

வெளிச்சத்தில்தான்

இவ்வளவு தூரம் வந்திருக்கிறேன்

இருப்பினும்

இதுகாறு மெனக்கு

வழியிடையே

காலையிடறும் சிறு

கல்லையெடுத்து

தூரப் போடத்

தோன்றியதில்லை

அணையவிருக்குமொரு திரியைத் தூண்டி

துளிபோல

எண்ணெய்விடவேண்டுமென்ற

எண்ணம் எழுந்ததில்லை

எந்த ஒளி பிறகென்

எழுத்துகளில் வந்தமரும்?

எனது விழைவெல்லாம் வேறெதுவுமில்லை

எள்முனையளவும் பிழையின்றி

இழைத்திழைத்து

இச் சொற்களை

பளிங்காக்கிப்

பார்வைக்கு வைத்திடல் வேண்டும்

உற்றுப் பொருள் காண

முனைவோர் தம்

முகம் பலிக்க.